Freastalóidh acadóirí, gairmithe, mic léinn agus cainteoirí Gaeilge ar 17 n-institiúid cheannródaíocha i Stát Aontaithe Mheiriceá chun dul i mbun taighde, staidéir, teagaisc agus comhoibrithe le saineolaithe ina réimsí ó Lúnasa 2023 go Lúnasa 2024.

Tá clár malartaithe déthaobhach Fulbright aitheanta as iarratasóirí den scoth a roghnú ar fud Oileán na hÉireann chun dul i mbun staidéir agus oibre le hinstitiúidí sna Stáit Aontaithe ar fud gach disciplín ó shláinte, eolaíocht, teicneolaíocht agus gnó go healaíona agus cultúr. De réir mar a théann dámhachtaithe Fulbright chun tosaigh leis na deiseanna spreagúla seo, tá fairsinge a gcaidreamh sna Stáit Aontaithe éagsúil agus éachtach.

Tá na ceangail idir Éire agus na Stát Aontaithe níos láidre ná mar a bhí riamh le cuairt Uachtarán Mheiriceá Joe Biden ar Éirinn, tabharfaidh 37 dámhachtaí as Éirinn aghaidh ar na Stáit Aontaithe le smaointe agus eolas a mhalartú agus chun feidhmiú mar ambasadóirí cultúrtha. Agus an méid sin á dhéanamh acu treisíonn siad na ceangail idir Stáit Aontaithe Mheiriceá agus Éire chun tuiscint agus comhbhá a theastaíonn go géar i saol an lae inniu atá níos deighilte ná mar a bhí riamh a chruthú.

San áireamh i roghnú na bliana seo tá beirt de na buaiteoirí ó Fulbright-Éire Cruthaitheach Susan Boyle agus an Dr Kevin McDermot.

Is taighdeoir deochanna agus drámadóir í Susan Boyle. Tá a cuid taighde PhD ag an Ollscoil Teicneolaíochta, Baile Átha Cliath i Staidéar Deochanna agus baineann sé le feidhmíocht, scéalaíocht agus céadfach eispéiris deochanna tumoideachais. Faigheann sí tacaíocht ó Scoláireacht Sármhaitheasa TU Bhaile Átha Cliath agus maoiniú ón Centre for Franco-Irish Studies. Mar Chomhaltacht Músaem Fulbright-Creative Ireland ag Dámhachtain Smithsonian, cuirfidh Susan tús le comhaltacht ag Músaem Smithsonian de Stair Mheiriceá, Washington DC ag fiosrú tionchar na n-inimirceach Eorpach ar ghrúdaireacht agus driogadh réamh-thoirmeasc sna S.A.

Is scríbhneoir seanbhunaithe ficsean leanaí é an Dr Kevin Mc Dermott, cleachtóir ealaíon san oideachas a bhfuil taithí aige, agus tacadóir don scríbhneoireacht chruthaitheach san oideachas. D’oibrigh sé ar roinnt cónaitheachtaí scoilbhunaithe scríbhneoireacht chruthaitheach, le tacaíocht ó Éigse Éireann agus Tionscadal Leabharlann Taispeána an TSCS. Mar Scoláire Comhaltachta Gairmiúla Fulbright-Éire Cruthaitheach, ag obair leis an Tionscadal Náisiúnta Scríbhneoireachta in Berkeley, forbróidh sé an teoiric agus an cleachtas a bhaineann le casadh le scríbhneoirí óga i gceardlann na scríbhneoireachta cruthaithí d’fhonn iad a éascú lena dtaithí a fhiosrú, a cheistiú agus a cheiliúradh, i gcúinsí agus sainiúlacht a ndomhan féin, ina bhfocail féin.

Taistealóidh na dámhachtaithe chuig 17 stát ar fud Stát Aontaithe Mheiriceá á neadú féin in institiúidí a théann ón Dana-Farber Cancer Institute i mBastún, Poets House Nua-Eabhrac agus Ollscoil Hawaii, go dtí an Smithsonian Institution agus an East Los Angeles College – an coláiste pobail is mó in California. Beidh Scoláirí agus Mic Léinn Fulbright as Éirinn agus Cúntóirí Múinteoireachta i dTeangacha Iasachta (FLTA’nna) rannpháirteach freisin le sochaí na Stát Aontaithe agus ag comhroinnt a gcuid eolais agus saineolais ar fhilleadh abhaile dóibh.

1 Dámhachtaí Cónaitheach as Éirinn

An Comhollamh Tom Felle

10 Mac Léinn Fulbright as Éirinn

Susan Boyle; Conall Geoghegan Moore; Luke Gibbons; Eoin Oude Essink; Áine McBride/Mac Giolla Bhríde; Terence McSweeney; an Dr Lukas O’Brien; Andrew Ó hEachteirn; Jessica O’Neill; an Dr Daniel O’Reilly

9 FLTA Fulbright

Abaigéal Drummy; Niamh Hetherington; Annie Mary Jowett; Conchobhar Mac Giolla Bhríde; Caoimhe Ní Chonghaile; Shauna Ní Dhochartaigh; Eibhlín Seoige Nic Cormaic; Seán Ó Coistealbha; Niall Páirc

Dúirt an tAire Stáit sa Roinn Turasóireachta, Cultúir, Ealaíon, Gaeltachta, Spóirt agus Meán agus sa Roinn Oideachais, Thomas Byrne TD:

“Tá ár stair chomhroinnte agus ár luachanna coitianta mar bhonn taca leis an dlúthchaidreamh idir Éire agus na Stáit Aontaithe. Is teistiméireacht é Coimisiúin Fulbright agus na Fulbrighters, san am atá caite agus san am i láthair, ar na traidisiúin is fearr den mhalartú acadúil agus cultúrtha agus tá cáil thar barr orthu ó thaobh ionadaíocht a dhéanamh ar Éirinn. Tá Rialtas na hÉireann mórtasach a dtacaíocht a thabhairt don chlár seo, ag a bhfuil ról ríthábhachtach ó thaobh cur le tuiscint trasatlantach agus ceangail acadúla iontacha a chruthú tríd an Roinn Gnóthaí Eachtrach agus an Roinn Turasóireachta, Cultúir, Ealaíon, Gaeltachta, Spóirt agus Meán. Comhghairdeas ó chroí agus gach dea-ghuí ar Dhámhachtaithe Fulbright na hÉireann 2023-2024.”

Dúirt Mike Clausen, Chargé d’Affaires na Stát Aontaithe chun na hÉireann:

“Is ionann an Clár Fulbright agus tionscnamh malartaithe oideachais agus cultúir idirnáisiúnta mór le rá rialtas na Stát Aontaithe. Tá ról ríthábhachtach ag an gclár ó thaobh an dlúthchaidrimh uathúil idir na Stáit Aontaithe agus Éire a chothabháil agus a chur chun cinn. Malartaíonn dámhachtaithe Fulbright taighde, eolas, smaointe agus cultúr agus cuireann le fadhbanna tábhachtacha domhanda a réiteach. Is mian liom comhghairdeas a dhéanamh le dámhachtaithe na bliana seo agus gach rath a ghuí orthu sna Stáit Aontaithe agus níos faide ar shiúl.”

Dúirt an tOllamh Diane Negra, Cathaoirleach Choimisiún Bhord Fulbright na hÉireann:

“Táim ag labhairt thar ceann Choimisiún Bhord Fulbright na hÉireann go léir agus comhghairdeas á dhéanamh agam leis na 37 dámachtaí Fulbright ar a ndámhachtainí a fháil. Is ionann Fulbright agus taighde ardleibhéil, barr feabhais acadúil agus comhoibriú traschultúrtha agus is mian liom gach rath a ghuí ar na dámhachtaithe agus iad ag taisteal chuig na Stáit Aontaithe, beidh siad ag bualadh le líonra bríomhar d’alumni gairmiúil agus beidh taithí á fháil acu ar mhalartú cultúrtha agus oideachais atá saibhir agus uathúil a chuimsíonn dámhachtain Fulbright.”

Dúirt an Dr Dara FitzGerald, Stiúrthóir Feidhmiúcháin Choimisiún Fulbright in Éirinn:

“Déanaim comhghairdeas ó chroí leis na dámhachtaithe nua ar an onóir mhór seo agus Dámhachtain Fulbright bainte amach acu. Tá an Coimisiún bródúil as dámhachtaithe na hÉireann a bhíonn ag gabháil den rannpháirtíocht sna Stáit Aontaithe agus a fhilleann abhaile agus a chomhroinneann an méid atá foghlamtha acu. Is mian liom buíochas a ghlacadh leis na comhpháirtithe, leis na páirtithe leasmhara agus leis an lucht urraíochta a thacaigh linn le blianta anuas. Ní féidir luach a chur ar an tacaíocht atá a chur ar fáil acu i láthair na huaire agus atá curtha ar fáil leis na blianta.

Is mian liom aitheantas a thabhairt don chaidreamh atá againn, caidreamh atá ag dul i méid leis na hOllscoileanna Teicneolaíochta, lena n-áirítear, Ollscoil Teicneolaíochta Bhaile Átha Cliath, Ollscoil Teicneolaíochta na Sionainne: Lár Tíre, An tIarthar Láir, Ollscoil Teicneolaíochta na Mumhan agus Ollscoil Teicneolaíochta an Oirdheiscirt. Is mian linn gach rath a ghuí orthu agus iad ag forbairt agus soláthróimid tacaíochtaí dá dtionscnaimh.”